مركز حقوق المرأة في مصر يرد على رضوى الشربيني:الرجل ليس خروفا
علقت نهاد أبو القمصان، رئيسة المركز المصري لحقوق المرأة، على تحويل الإعلامية رضوى الشربيني للتحقيق، على خلفية حديثها “مش فاهمة ليه البنات مبتحبش تاكل لحم الخروف بس بتحب ترتبط بيه”
وقالت أبو القمصان، خلال فيديو لها نشرته على صفحتها الرسمية على “فيس بوك”: مبدئيا مين اللي قالك إن البنات مش بتحب اللحمة الضاني، ده في حد ذاته خطأ يستوجب التحقيق واللحمة الضاني دي جميلة واللي مبيعرفش يعملها سواء الستات أو الرجالة دول الخايبين والأحكام العامة غلط ومينفعش إعلاميين يقولوا البنات أو الولاد مبتحبش اللحمة الضاني في حاجة اسمها كده؟”
وأضافت: “الحاجة التانية أننا نشبه فئة من البشر أنهم خروف ده منتهى العنصرية، ودي مش فارقة خالص عن مذيعة الجرس، اللي هي في النهاية برده بتعمل أحكام هبلة كده وإطلاقية وملهاش أي لازمة، والقناة اللي هي فيها خدت موقف واتلمت شوية وإحنا عملنا بلاغ للنائب العام ولسه شغال وفي النيابة العامة”
وتابعت: الاتنين سواء مذيعة البلوك أو مذيعة الجرس وجهين لعملة واحدة والاتنين بيقولوا إننا عندنا مستوى متدن في الإعلام.. لا دي بتدافع عن الرجالة ولا دي بتدافع عن الستات
واستطردت: “ومش بتفرج على الاتنين لأن مضمون البرنامجين، أن الست متعملش حاجة في الحياة غير أنها تروح الجيم تعمل عضلات كويسة في رجلها عشان تعرف تجري ورا الرجالة بس”
وكانت أعلنت إدارة قنوات cbc المصرية، تحويل المذيعة رضوي الشربيني للتحقيق بسبب المنشور الذي قامت بنشره على صفحتها الشخصية على مواقع التواصل
وقالت إدارة قنوات cbc في بيان، إن منشور رضوى الشربيني “تسبب في إساءة لاسم المؤسسة رغم أنه لم يذاع أو ينشر على إحدى منصات القناة”
وكانت رضوى الشربيني أثارت جدلا بعد تغريدتها الأخيرة واتهامها بالإساءة إلى الرجل ووصفه بالخروف
وقالت رضوى الشربيني في تغريدة عبر حسابها: “مش فهمه ليه البنات ما تحبش تاكل لحم الخروف بس بتحب ترتبط بيه”
هذا الأمر تسبب باستياء الكثير من الجمهور واتهموها بالإساءة إلى الرجل ووصفه بالخروف
ولاحقا قامت رضوى الشربيني بحذف التغريدة على وقع الكثير من التعليقات التي انتقدت ما نشرته
