رسالة من زوج اردني بعد ان حضر ميلاد زوجته

كتب مواطن اردني رسالة فخر وتقدير لكافة الامهات في العالم على معاناتهن خلال الحمل والولادة وما بعد ذلك من جهود في تربية الاطفال، وجاء هذا بعد ان حضر ولأول مرة في حياته ولادة زوةجته كاملاً لطفله الأول، وتالياً ما كتبه..

 

ما بدي قول كأب لأني والد من مبارح العصر بس، بس كواحد أول مرة بحياته بحضر ولادة، وكانت ولادة صعبة قعدت تقريباً 36 ساعة، فالولادة تجربة مبهرة، ألم ما بتحمله جبل..

أنا كرجل بنص المرحلة وأنا ما بتوجع كنت صرت مقرر أنه خلص وقفوا اللي بصير، ما بدنا نخلف .. وقفوه بأي طريقة..

المهم إليكم بعض الملاحظات:

🧿١- كل اللي سمعته بحياتك من تعظيم للأم ما بيسوى طلقة وحدة (الطلقة هي انقباض للرحم يحدث أثناء الولادة).. الأم مخلوق لازم يتبجل..

🧿٢- الرجل مخلوق عادي ، الطبيعة أعطته شوية عضلات مشان يعتني بزوجته وبالبيت يعني يروح ويجيب ويبني بيت .. هيك شغلته .. وكل اللي بصير بالمجتمع من سيطرة للرجل هو خلل لازم يتعالج…

🧿٣- في عيد الأم لازم يقسموا الأمهات، إذا وهي بتخلفك أخدت إبرة الظهر مشان التخدير (Epidural) جبلها عشر هدايا، إذا ما أخدتها جبلها ألف…

🧿٤- اللي برفع صوته على أمه، وبقلل أدبه عليها لازم يعطوه طلق صناعي وبعدين يدعسوا ببطنه بعدين يقطبوله (يغرزولو) محل الدعسة وبعدين يبعتوه عالسجن مشي..

🧿٥- الرجل اللي ما بيدخل مع زوجته عالولادة ما بيعرف قيمة الأطفال ولا رح يقدّر تعب مرته .. ورح تروح عليه أهم معجزة بالطبيعة..

🧿٦- المعجزة الثانية هي فرحة الام بأنو المخلوق اللي سبّبلها كل هالوجع والتعب بخير.. بتحمله كأنه في حدا تالت سببلهم الألم هنن الاثنين.. أحمد ربك كرجل أنهم قابلين يشاركوك بهاي اللحظة…

🧿٧- بعتذر لأمي على كل مرة قللت أدبي أو رفعت صوتي أو نقّيت على طبخة .. لازم لطشتيني بالكف…

🧿٨- أمك ثم أمك ثم أمك ثم ضلّك قول “ثم أمك” لحد ما ينقطع نفسك ..

🧿٩- كل واحد بالقانون أو بالقوة أو بأي وسيلة ثانية بيمنع أم عن أولادها، لازم يعدموه شنقاً بحبل سري..

🧿١٠- الفرحة لما بيوصل الطفل سالم ما بتشبه ولا بتساوي ولا بتقرّب حتى على أي فرحة بالعالم

اترك رد

زر الذهاب إلى الأعلى