بسطة بساطة في وسط البلد / وفاء العاصم
بسطة بساطه من وسط البلد ليش بالذات كتبت عنها ؟
معلم من معالم التواضع اعتبره المهم !!
مساءكم ” تواضع ” بس بهذا المكان اجزم انه المكان الوحيد بالأردن الي تحس فيه بالراحه النفسيه ..
البساطة تغلف المكان تغليف وتغلفك بدون ما تحس بحالك بكميه كبيره من الحب والامان
.. هالمكان خلاني اكتب عنه غصبن عني يجبرك تحبه وتشتاقله وتتمنى تزوره بين فتره والثانيه.. ناس عايشين فوق بعض بيوتهم تشبه اللوحات وكانهم يثبتو للعالم انه ما في فوقيه وما في اصلا مسميات عائلية أو حتى قبليه..
مستحيل تزور وسط البلد وما تشتريلك كتاب ما تحس حالك الا وقفت واشتريت كتاب من نفس الكشك الثقافي الي يبيع كتب من سنين هو هو ماتغير مكانه ،، هناك تشوف الكبير والصغير الغني والفقير
.. وتشوف ناس من مختلف الجنسيات وسواح من كل البلدان .
. اما بالنسبه للاشي الأهم الي هو مطعم هاشم مستحيل تروح هناك وما تزوره هون بس تشوف البساطة بدون تكلف طاولات وكراسي قدام واشي قاعد برا واشي جوا صار رمز ومعلم تاريخي ومكان لازم الكل يزوره ويجرب أكله ..
مين قال المكان ما يغير فيك ؟ومين قال المكان ما يجسد روح تعكس على ثنايا روحك عنفوانيه وحب..؟! ارفع قبعتي لهالمكان الي مهما تزوره ما تمل منه وعن نفسي مهما اروحله ما أمل منه عيشو بتواضع عيشو بحب ورضا ودايما قولو اللهم اننا نسألك عيش السعداء لان السعداء هم نفسهم الي يعيشو بحب وتواضع ورضا.. وفاء العاصم
